ភ្នំពេញ: សមាជិកសភា និងជាប្រធានសហភាពសហព័ន្ធយុវជនកម្ពុជាលោក ហ៊ុន ម៉ានី បានលើកឡើងថាវេទិកាសន្តិភាពកម្ពុជា បានរួមចំណែកយ៉ាងសំខាន់ជាមួយរាជរដ្ឋាភិបាលកម្ពុជា ក្នុងការផ្សព្វផ្សាយ និងបញ្ជ្រាបការយល់ដឹងពីដំណើរស្វែងរកសន្តិភាព គុណតម្លៃ និងផលប្រយោជន៍នៃសន្តិភាពដល់យុវជន និងប្រជាពលរដ្ឋកម្ពុជាទូទាំងប្រទេសកម្ពុជា។

លោកបានសរសេរនៅលើហ្វេសបុកផេករបស់លោកនៅថ្ងៃព្រហស្បតិ៍ ទី០៧ ខែកក្កដានេះថា សន្តិភាពពិបាកទទួលបានណាស់ ហើយក៏វានឹងងាយបាត់បង់ដូចគ្នា។ ក្នុងន័យនេះការបញ្ជ្រាបផ្សព្វផ្សាយពីសន្ដិភាពជូនពលរដ្ឋឲ្យបានយល់ដឹងគឺពិតជាសំខាន់។ 

លោកបន្ថែមថា សហភាពសហព័ន្ធយុវជនកម្ពុជា (ស.ស.យ.ក.) នឹងបន្តចូលរួមក្នុងបេសកកម្ម ដើម្បីផ្សព្វផ្សាយពីគុណតម្លៃនៃសុខសន្តិភាព ព្រោះសន្តិភាពពិបាកទទួលបានណាស់ ប៉ុន្តែសុខសន្តិភាពនេះងាយនឹងត្រូវបានបាត់បង់ក្នុងពេលតែមួយរំពេចតែប៉ុណ្ណោះ។ 

ការលើកឡើងរបស់លោក ហ៊ុន ម៉ានី ធ្វើឡើងក្នុងឱកាសដែលលោកបានចូលរួមជាអធិបតី ក្នុងពិធីបិទមហាសន្និបាត វេទិកាសន្តិភាពកម្ពុជា ដែលបានប្រព្រឹត្តិទៅនៅក្នុងខេត្តសៀមរាប នារសៀលថ្ងៃទី០៧ ខែកក្កដា ឆ្នាំ២០២២៕